Stanishev i Bullgarisë do raport të balancuar të BE

10/06/2008

Kryeministri bullgar paralajmëron se një vlerësim negativ i KE dhe sanksionet mund të shkurajojnë reformën dhe të mbjellin paqëndrueshmërinë politike.

(FT, Dnevnik, Mediapool, Europe.bg - 10/06/08; SNA, Dnevnik, Mediapool, Europe.bg, Bulgarian Government - 09/06/08; BBC - 07/06/08; Mediapool - 04/06/08; The Times - 23/05/08)

"Detyra e kabinetit është të arrijë gjithëshka që mund të arrihet. Gjithsesi, do të ketë raporte të ardhëshme," tha kryeministri bullgar Sergej Stanishev. [Getty Images]

Kryeministri bullgar Sergej Stanishev shprehu shpresë të hënën (9 qershor) se një raport i ardhshëm mbikqyrës i Komisionit Evropian (KE) mbi vendin e tij duhet të vërë në dukje jo vetëm të metat por edhe arritjet gjithashtu.

Raporti që pritet në 16 qershor, do të jetë i dyti për këtë vit. Në një raport të përkohshëm në shkurt, Brukseli kritikoi Bullgarinë për rezultatet e saj jobindëse në reformën gjyqësore dhe luftën kundër krimit të organizuar dhe korrupsionit.

Ndërsa zotohej të merrte veprim, vendi ballkanik ka qenë i ngadalshëm në zbatimin e masave të kërkuara. Ai megjithatë, ngriti një Agjensi Shtetërore të Sigurimit Kombëtar për të ndihmuar me krimin e organizuar. Një tjetër hap ishte caktimi në prill i ish ambasadores së Sofjes në Gjermani, Meglena Plugçieva si nënkryeministre e ngarkuar me mbikqyrjen e përdorimit të fondeve të BE.

Ajo u bashkua me kabinetin si pjesë e një riorganizimi të madh të qeverisë në të cilin u zëvendësuan ministrat e shëndetësisë, bujqësisë, mbrojtjes si edhe ministri i brendshëm Rumen Petkov. Masa pasoi një skandal që lidhte Petkov, një anëtar i lartë i Partisë Socialiste Bulgare (BSP) të Stanishevit dhe disa zyrtarë të tjerë të ministrisë me të dyshuar të krimit të organizuar.

Ministri i zhvillimit rajonal dhe punëve publike Asen Gagauzov u kursye ndonëse u bë e qartë më parë këtë vit se kreu i agjensisë rrugore i kishte dhënë vëllait të vet kontratat me vlerë rreth 50 milion euro.

Dyshimet rreth mashtrimeve të mundëshme në përdorimin e fondeve të BE bënë KE të ngrijë rreth 400 milion euro në ndihmë për Bullgarinë. Brukseli i dha gjithashtu Bullgarisë deri në 16 qershor për të bërë 25 përmirësime në mënyrën e trajtimit të parave të taksapaguesve të BE.

Një raport negativ i BE mund të shpinte potencialisht në sanksione të mëtejshme dukie përfshirë mosnjohjen e vendimeve të gjykatës bullgare nga vende të tjera anëtare të BE.

Në një intervistë me të përditëshmen britanike Financial Times (FT), botuar të martën (10 qershor), Stanishev tha se penalizimi i vendit të tij mund të "dëmtojë procesin e reformës" dhe të mbjellë paqëndrueshmëri politike. Partitë e opozitës kanë kërcënuar të shtyjnë për rrëzimin e koalicionit qeverisës të kryesuar nga BSP dhe për zgjedhje të parakohëshme parlamnetare në qoftë se raporti i ardhshëm shkakton sanksione.

"Duhet kohë për të vënë këto standarde të reja evropiane," tha Stanishev. "Në qoftë se e krahason Bullgarinë me Suedinë, Hollandën apo Britaninë, mund të shohësh shumë probleme ende...por [këto vende] kanë patur qindra vjet demokraci."

"Ne kemi 20 vjet prapa dhe në këtë peirudhë kohe, ajo që kemi arritur është një revolucion," shtoi ai.