Shtetet e Bashkuara dhe BE dakord të mbështesin zhvillimin e Kosovës

12/06/2008

Në një deklaratë në samitin SHBA-BE në Slloveni, të dy palët premtuan të bashkëpunojnë në sigurimin e një kalimi të butë të pushtetit midis misioneve të OKB dhe BE në Kosovë.

Nga Blerta Foniq-Kabashi për Southeast European Times në Prishtinë -- 12/06/08

Presidenti i SHBA Xhorxh W. Bush (majtas) dhe kryeministri slloven Janez Jansa flasin me shtypin në Brdo. [Getty Images]

Përfaqësuesit e SHBA dhe të BE nënshkruan të martën (10 qershor) një deklaratë të përbashkët për mbështetjen e integrimit rajonal dhe zhvillimit institucional e ekonomik të Kosovës, gjatë një samiti mbajtur në Brdo pri Kranju, Slloveni. Axhenda mbulonte çështje rajonale e politike, sigurimin global, sfidat e sotme globale dhe tregtinë dypalëshe.

Lidhur me Kosovën, BE tha se ai "përshëndet pjesëmarrjen e SHBA në" misionin e bllokut EULEX që pritet të zëvëndësojë përfundimisht UNMIK.

"Ne do të bashkëpunojmë mbi kompletimin e një tranzicioni të butë nga UNMIK te përgjegjësitë e EULEX për rendin e ligjit dhe vendosjen e plotë të misionit anembanë Kosovës, gjë që është thelbësore për stabilitetin e Kosovës," thoshte deklarata e përbashkët.

Shtetet e Bashkuara dhe BE përshëndetën përparimin e Kroacisë, Serbisë, Shqipërisë, Maqedonisë, Bosnje dhe Herzegovinës dhe malit të Zi në udhën e integrimit në Bashkim.

Dokumenti mbulonte një rang të gjerë temash të diskutuara nga presidenti Xhorxh W. Bush dhe krerët e BE, duke përfshirë kryeministrin slloven dhe presidentin e Këshillit të BE, Janez Jansa.

"Ky është takimi i tetë BE-SHBA dhe mesazhi im në fund është se është vërtet e rëndësishme për SHBA të qëndrojë afër me BE," tha Bush gjatë një konference shtypi pas takimit. "Është në interesat tona që BE të jetë e fortë dhe e gjallë dhe është në interesat tona të punojmë shumë për të patur një partneritet që zgjidh problemet dhe ne diskutuam shumë probleme sot."

Bush foli rreth Kosovës me homologun e tij slloven Danilo Turk. "Të dy presidentët diskutuan situatën në Kosovë, procesin paqësor në Lindjen e Mesme dhe disa çështje ndërkombëtare," tha zyra e presidentit slloven.

Gjatë udhëtimit të tij, siç u raportua nga Reuters, Bush do të kërkojë mbështetje nga BE për luftimin e sëmundjeve të kurueshme në Afrikë dhe rritjen e numrit të punonjësve të kujdesit mjekësor në atë kontinent.

Vëzhguesit presin që Bush të nxisë BE për një strategji ndaj Iranit. Të hënën, një diplomat i tha shtypit se SHBA do të donte të shihte që BE të vinte më tepër kontrolle ndaj veprimtarisë bankare të Iranit.